V Festival Hércules Brass Celanova

Dende Hércules estamos moi contentos de poder presentar o “V Festival Hércules Brass Celanova”.

Tras a experiencia e os éxitos obtidos nas nosas anteriores edicións, seguimos traballando para facer deste encontro musical todo un referente para os músicos de vento metal.

Dende o 30 de xullo ao 3 de agosto de 2018 queremos que respires connosco música, ilusión e entusiasmo, que goces de novos concertos e, como non, que aprendas e compartas experiencias únicas da man dos mellores profesores de trompeta, trombón, trompa e tuba.

 

Para isto, seguimos organizamos clases maxistrais con profesores cos que nos sentimos moi identificados polo seu estilo de tocar e ensinar, explotando ao máximo a nosa conexión coa Orquestra da Academia Nacional Santa Cecilia de Roma (Italia), contando este ano, ademais de Andrea Conti, con Fabio Frapparelli e Alfonso González Barquín, que será a partir deste outono o novo solista de trompeta. Como complemento, temos a sorte de contar con profesores da talla de José Redondo, Estefanía Beceiro, Iván Crespo, e os moi queridos Jon Etterbeek e Roberto Bodí.
Convidamos importantes grupos como Spanish Brass, todo un referente mundial nos quintetos de metais que conta cunha longa traxectoria e os alacantinos Thinking Brass que, tras aterrar desde Suíza, actuarán por primeira vez en Galicia.
Así mesmo, hai que engadir o concerto no órgano de San Salvador con Fernando Buide, o concerto de Galicia Brass Band, unha agrupación creada nas rías baixas e formada por mozos músicos de vento metal.
Unha vez máis, tendo en conta o agarimo e a estíma á Banda de Música de Celanova, organizamos unha bonita velada que mesturará os acordes desta xunto co humor e o enxeño dos percusionistas Píscore.
Ademais, Hércules Brass Ensemble contará este ano con Luís Miguel Méndez á batuta, un músico galego, clarinetista da Orquestra do Teatro Real (Madrid), que está a cultivar moitos éxitos na dirección de Orquestra.
Como broche final, o alumnado será o encargado de pechar este ano o festival interpretando todos xuntos un espectacular repertorio.
Consideramos que o festival é unha proposta fascinante para todo o alumnado dos instrumentos de vento metal porque terá a oportunidade de coñecer, ver e escoitar a outras persoas participantes chegadas de diferentes puntos de España e do estranxeiro, e á súa vez tamén, para o público en xeral polo alto nivel artístico que poderá gozar durante ditos días. 
 

Esperámoste en Celanova, ven a vivilo por ti mesmo e que ninguén cho conte. 

 
 

Hércules Brass